सिन्धुपाल्चोक, ४ माघ । जिल्लाको बलेफी गाउँपालिकाको उपाध्यक्ष सरु लामा तामाङले गाउँपालिका अध्यक्षलाई सम्बोधन गरेर लेखिएको निवेदनमा तोक लगाएपछि विवादमा तानिएकी छन् ।
न्यायिक समितिको संयोजक समेत रहेकी उनले पालिका अध्यक्ष गंगाबहादुर तामाङलाई सम्बोधन गरिएको पत्रमा तोक लगाएपछि अख्तियारको दुरुपयोग सम्बन्धि कानून आकर्षित भएको हो । अध्यक्षलाई लेखिएको निवेदनमा निवेदक मध्ये सबैभन्दा पहिलो नाम उपाध्यक्ष लामाको छ । उनले त्यसमा हस्ताक्षर गरेकी छन् भने प्रशासनलाई पत्र दर्ताका लागि तोक लगाएकी छन् । पालिका अध्यक्ष गंगाबहादुर तामाङ कार्यालय बाहिर रहेको र अध्यक्षले उपाध्यक्षलाई पदको अख्तियारी समेत नदिएको अबस्थामा आफू आबद्ध दलको दवाबमा उनले सो कार्य गरेको खुलेपछि उपाध्यक्ष लामालाई कानूनि समस्या आइपरेको हो ।
सामाजिक सञ्जाल फेसबुकमा आफ्नो तस्बिरसँगै ‘सहि काम गर्न सक्नु हुन्न भने गलत काम पनि कहिल्यै नगर्नु नि हैन हजुर’ लेखेकी उनले लगाएको तोक आदेश र नियम विपरितको कार्यले उपाध्यक्ष नै अप्ठेरोमा परेकी हुन् । गाउँपालिका अध्यक्ष गंगाबहादुर तामाङले उपाध्यक्षको तोक आदेशले आश्चर्य लागेको बताए । ‘म कार्यालय बाहिर थिएँ, कानून विपरित उहाँले त्यतिसम्म गर्नुहोला जस्तो लागेको थिएन, मलाई सोधिएको पनि थिएन, मैले उहाँलाई अख्तियारी दिएको पनि छैन’ अध्यक्ष तामाङले भने ।
विशेष गाउँ सभा बोलाउने सम्बन्धमा अध्यक्षलाई लेखिएको पत्र अध्यक्षलाई समेत जानकारी नगराई तोक आदेश लगाएर दर्ता गर्न लगाइनु कानून विपरित रहेको बलेफी गाउँपालिकाका कानूनि सल्लाहकार रामहरी नेपालले बताए । ‘यस सम्बन्धमा उहाँले मसँग पनि सल्लाह गर्नु भएन, यो सरासर गैरकानूनी काम हो, नसच्याए अख्तियार दुरुपयोगमा जान्छ’, उनले भने । उपाध्यक्ष लामाले भने आफूले अख्तियारको दुरुपयोग गरेको पत्र आफ्नै सामाजिक सञ्जालमार्फत पोष्ट गरेकी छन् । सञ्चार र गायन क्षेत्रमा रहेका उनका पति प्रितम गोले तामाङले उपाध्यक्षको सो कामलाई गर्वसाथ प्रचार गरेका छन् । अख्तियारको दुरुपयोग सम्बन्धमा भने उनी सञ्चारमाध्यमको सम्पकमा आउन चाहिनन् ।
यसअघि राजश्व नै उठाउन नहुने माग राखेर काँग्रेस निकट जनप्रतिनिधिले गाउँसभा रोकेका थिए । चौतर्फी विरोध भएपछि उनीहरु सो माग फिर्ता गरेर गाउँसभामा सहभागि भएका थिए । हाल पालिका भित्रका विद्यालय व्यवस्थापन समितिका अध्यक्ष चयनका लागि कार्यपालिकामा बैठकको निर्णय अनुसार अघि बढिएको पालिकाले जनाएको छ । निर्वाचित जनप्रतिनिधि मात्रै व्यवस्थापन समितिमा रहने व्यवस्थालाई संसोधन गरी शिक्षाप्रेमि, अविभावक र वुद्धिजिविलाई समेत मनोनयन गर्नेगरि कार्यविधिमा संसोधन गर्ने निर्णयमा निवेदकहरुले नै हस्ताक्षर गरेको पाइएको छ । मंसिर २९ गतेको कार्यपालिका बैठकमा शिक्षा कार्यविधि चौथो संसोधन भएको र सो संसोधन गर्ने निर्णयमा उपाध्यक्ष सहित कार्यपालिका सदस्यहरुले हस्ताक्षर गरेका छन् ।
गत वैशाखमा सम्पन्न स्थानीय तह निर्वाचनमा अध्यक्ष गंगाबहादुर तामाङले माओवादी केन्द्रबाट चुनाव जितेका हुन भने उपाध्यक्ष लामा नेपाली कांग्रेसबाट निर्वाचित भएकी हुन् । कार्यपालिकामा कांग्रेसको बहुमत भएको भन्दै कानून विपरित जान उक्साएपछि उपाध्यक्ष लामाले कानून विपरित अख्तियारको दुरुपयोग गरेको पाइएको छ ।
