२५ फागुन, काठमाडौं । प्रधानमन्त्री एवं माओवादी अध्यक्ष पुष्पकमल दाहाल प्रचण्ड नेतृत्वको सत्ता गठबन्धन आवद्ध मतदाताहरुले नेपाली कांग्रेसका बरिष्ठ नेता रामचन्द्र पौडेललाई देशको तेस्रो राष्ट्रपति निर्वाचित गरेका छन् ।
आज भएको निर्वाचनमा नेकपा (एमाले) का उपाध्यक्ष सुवासचन्द्र नेम्वाङलाई हराउँदै पौडेल राष्ट्रपति निर्वाचित भएका हुन् । उनले २ सय १४ संघीय सांसद र ३ सय ५२ प्रदेश सांसदको गरी ३३ हजार ८०२ मतभार पाएका छन् । प्रतिस्पर्धी नेम्वाङले ९६ संघीय सांसद र १ सय ६२ प्रदेश सांसदको १५ हजार ५ सय १८ मतभार पाएका छन् ।
पौडेललाई नेपाली कांग्रेस, नेकपा (माओवादी केन्द्र) र राष्ट्रिय स्वतन्त्र पार्टीसहित १० दलको समर्थन थियो। निर्वाचन आयोगका अनुसार कूल ८ सय ८२ मतदातामध्ये ८ सय ३१ मतदाताले निर्वाचनमा भाग लिएका छन्। ३ सय ३२ संघीय संसदका सदस्यहरुमध्ये ३ सय १३ जना र ५ सय ५० प्रदेश सभा सदस्यहरुमध्ये ५ सय १८ जनाले मतदान गरेका हुन्। राष्ट्रपति निर्वाचनमा संघीय सांसद र प्रदेश सभाका सांसदहरु मतदाता हुन्।
