१० वैशाख, काठमाडौं । प्रधानमन्त्री तथा नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले एउटै पार्टीले बहुमत ल्याएर सरकार बनाउने भन्दा गठबन्धन संस्कृतिलाई जगेर्ना गर्नुपर्ने आवश्यकता रहेको बताएका छन् ।
नरबहादुर कर्माचार्य स्मृति प्रतिष्ठानको दोस्रो वार्षिक केन्द्रीय सभालाई सम्बोधन गर्दै प्रधानमन्त्रीले यस्तो बताएका हुन् । उनले भने, ‘वर्तमान संविधान र निर्वाचन प्रणालीका आधारमा अहिलेको स्थितिमा कुनै पनि दलले बहुमत ल्याएर सरकार बनाउने सम्भावना धेरै कम छ । त्यसकारण हामीले यो गठबन्धनलाई पाँच वर्ष नै चलाएर यसको माध्यमबाट जनतालाई सेवा दिने चुनौति छ ।’
उनले नेपालको कम्युनिष्ट आन्दोलनलाई सही बिचार, नीति, कार्यशैली र संस्कारको आधारमा एकतावद्ध गर्ने प्रयासमा एकहदसम्म आफूहरु सफल नै भएको तर्क गरे । प्रधानमन्त्रीले विगतका वामपन्थी एकता र ध्रुबीकरणको प्रसंग कोट्याउँदै भने ‘हाम्रो एकता र ध्रुबीकरणको प्रक्रियालाई नेता–कार्यकर्ता र जनताले उत्साहको साथ अनुमोदन पनि गरेकै हो । हामीले संसार भरका बामपन्थी बिरोधीको घेराभित्र बसेर दुईतिहाई सरकारको नेतृत्व प्रतिस्पर्धाबाट ल्याउने भन्ने सानो कुरा थिएन ।’ यसमा कसैलाई दोष नदिई आफूहरुले नै बचाउन उनको टिप्पणी थियो । अहिले पनि कम्युनिस्ट आन्दोलन जनतामा लोकप्रिय नै रहेको उल्लेख गर्दै प्रधानमन्त्री प्रचण्डले सही नीति र विचारको आधारमा र भावानात्मक रुपले फेरि पनि एकताको उद्देश्य छोड्नु नहुने धारणा व्यक्त गरे ।
