१ जेठ, काठमाडौं । नेकपा (माओवादी) केन्द्रका सांसद माधव सापकोटा ‘सुबोध’ले विद्यार्थीको भविस्यमाथि खेलवाड गर्नेमाथि छानविन गरी गम्भीर कारबाही गर्न सरकारको ध्यानाकर्षण गराएका छन् ।
सोमबार प्रतिनिधि सभामा आकस्मिक समयमा सम्बोधन गर्दै सांसद सापकोटाले रत्न राज्य लक्ष्मी क्याम्पस (आर आर) का झन्डै पाँच सय विद्यार्थीको अंक पठाउने विषयमा भएको त्रुटिको घटनाबारे छानविनको माग गरेका हुन् । आर आर क्याम्पसका स्नातक तह प्रथम वर्षका विद्यार्थीको परिक्षामा सम्मिलित नभएको भनेर त्रिभुवन विश्वविद्यालयले नतिजा निकालेपछि यो विषयले गम्भिर रुप लिएको विषयमा सांसद सापकोटाले खोजविनको आग्रह गरेका हुन् ।
सम्बोधनका क्रममा उनले उनले मानव तस्करीसँग जोडिएको नक्कली शरणार्थी प्रकरणलाई निष्कर्षमा पुर्याउनु पर्ने बताएका छन् । उनले यसलाई विषयान्तर गर्दा भष्टाचारलाई नै सहयोग पुग्नेतर्फ सरकारको सिंगो संसद र सरकारलाई खबरदारी गरेका हुन् । क्रमशः अरू भ्रष्टाचारका फाइल पनि खोल्नु पर्ने धारणा राखेका थिए ।
सम्बोधनको पूर्णपाठ
‘आज ५९ औँ राष्ट्रिय विद्यार्र्थी दिवस, विद्यार्थीहरूले सुखद खबर सुन्नुपर्ने बिडम्बना आज त्रिभुवन विश्वविद्यालय र आरआर कलेजको लापरबाहीका कारण झन्डै ५ सय विद्यार्थीहरूको भविष्यमै प्रश्न चिन्ह खडा हुने गरीकन एउटा घटना अगाडि आयो । जुन सार्वजनिक मिडियाहरूमा सनसनीपूर्ण रूपमा आएको छ । आरआर कलेजले भन्छ– टियुको परीक्षा नियन्त्रण कार्यालयको गल्ती भयो । टियुको परीक्षा नियन्त्रण कार्यालय भन्छ– आरआर कलेजको कमजोरी भयो । एकले अर्कालाई दोषारोपण गर्ने र ५ सयभन्दा बढी विद्यार्र्थीहरूको जीवनमाथि खेलबाड हुने कार्य भइराखेको छ । दुई वर्षअघि हुनुपर्ने परीक्षा ढिलो गरेर २ वर्ष पछाडि भयो, एक वर्ष लगाएर बल्ल परीक्षाको नतिजा सार्वजनिक भयो । त्यो पनि ५ सय विद्यार्थीहरूको नतिजामा अनुपस्थित देखियो र, के सम्म आएको छ सञ्चार माध्यममा भने आन्तरिक रूपमा विषय शिक्षकले दिएको अंकमा समेत फेरबदल गरियो भन्नेजस्ता आरोपहरू समेत लागेर समाचार प्रकाशित भएका छन । यसबीचमा ती विद्यार्र्थीहरूले छात्रवृत्तिलगायतका अरू पाउने सुविधाबाट बञ्चित रहनसक्ने खतरा पनि उत्पन्न भएको छ । त्यसैले म सम्माननीय सभामुख मार्फत सरकार र सम्बन्धित निकायको ध्यानाकर्षण गराउँदै यो घटनाको छानबिन गर्दै दोषी उपर गम्भीर कारबाहीको माग राख्न चाहन्छु ।
साथै भ्रष्टाचारका बारेमा सिङ्गो देश र अन्तरास्ट्रिय जगत बहसमा छ, म सम्माननीय सभामुख मार्फत सबै माननीय सदस्य र सिङ्गो देशलाई के अपिल गर्न चाहन्छु भने अहिले मानव तस्करी जोडिएको भ्रष्टाचारको विषय आएको छ । सम्पूर्णरूपमा देश यसमा केन्द्रित हुनुपर्छ । यसलाई निष्कर्षमा पुर्याइनु पर्छ, यस विषयलाई विषयान्तर गर्ने, यस विषयलाई कमजोर पार्न अरू कुरा उठाउनु भनेको भ्रष्टाचारलाई नै मद्दत पुर्याउनु हो । अहिले चलिराखेको मानव तस्करसहितको विषयलाई निष्कर्षमा पुर्याएर अरू फाइल खोल्ने दिशामा सरकार जाओस्, धन्यवाद लालसलाम ।’
