१९ जेठ, काठमाडौं । नेकपा माओवादी केन्द्रका उपाध्यक्ष एवं पूर्वसभामुख अग्निप्रसाद सापकोटाको नेतृत्वको माओवादी प्रतिनिधि मण्डल दुई साता लामो चीन भ्रमण सकेर विहीबार राति स्वदेश फिर्ता भएको छ ।
सापकोटा नेतृत्वको २० सदस्यीय पार्टी प्रतिनिधि मण्डल यही जेठ ५ गते चीनतर्फ प्रस्थान गरेको थियो । नेपाली टोलीले चीनमा रहँदा सिचुवान प्रान्तको राजधानी छेन्दु, तिब्बतको राजधानी ल्हासा, बेइजिङ हुँदै हुबेई प्रान्तको सियान र उहानको भ्रमण गरेको थियो । तिब्बत यात्राका क्रममा नेपाली नेताहरुले कैलाश मानसरोबर यात्रा समेत गरेका थिए । भ्रमाणबाट नेकपा माओवादी केन्द्र र चिनियाँ कम्युनिस्ट पार्टी बीचको सम्बन्धमा नयाँ आयाम थपिएको विश्वास गरिएको छ । भ्रमणको उदेश्य पार्टीबिचको सम्बन्ध सुधार गर्ने, दुई देश बीचको सम्बन्ध प्रगाढ बनाउने, चीनले गरेको आर्थिक विकास र प्रगतिको बारेमा अनुभव आदानप्रदान गर्ने रहेको टोली नेता समेत रहेका उपाध्यक्ष सापकोटाले बताए । चीनले गरिबी निवारणमा हासिल गरेको प्रगतिको अनुभव आदानप्रदान, तिब्बतमा चीन सरकारले गरिबी निवारणमा हासिल गरेको उपलब्धिका बारेमा देख्ने र सिक्ने अवसर मिलेको उपाध्यक्ष सापकोटाको भनाई छ । गरिबी निवारण अभियानबाट जनताको जीवनस्तर माथि उठाउन सकिन्छ भन्ने कुरा पनि अनुभव गर्न पाएको उपाध्यक्ष सापकोटा बताए । उनले चिनियाँ नेतामा चीनमा द्रूत विकास भइरहेको, नेपालमा पनि विकासमा सहयोग गर्न पाए हुने थियो भन्ने मनसाय पाएको बताए ।
