१६ भदौ, सिन्धुपाल्चोक । नेकपा (माओवादी केन्द्र) का उपाध्यक्ष एवं पार्टी प्रवक्ता अग्निप्रसाद सापकोटाले माओवादी जनताका कुरा सुन्न अभियान लिएर गाउँ फर्किएको बताएका छन् । माओवादी केन्द्रले शनिवारदेखि सुरु गरेको तीन महिने “जनतासँग माओवादी विशेष रुपान्तरण अभियान” को गृहजिल्ला सिन्धुपाल्चोकको लिसंखु पाखर गाउँपालिका वडा न. ३ वाफलमा उद्घाटन गर्दै सापकोटाले सो कुरा बताएका हुन् । उनले स्थानीय उत्पादनका लागि सुरुवात गरेको जनसामुहिक कृषि फार्ममा काउलीको विरुवा रोपेर अभियानको उद्घाटन गरे ।
माओवादीको आधार इलाका मानिने वाफलमा शुक्रबार साँझ नै बास बस्न पुगेका सापकोटाले विहान, अभियान उद्घाटन कार्यक्रम र जनताको घरदैलोमा पुगेर अन्तरक्रिया गरेका थिए । पार्टीका स्थानीय नेता कार्यकर्ता र सर्वसाधारणले राखेका विषयबस्तु रुचिपूर्वक सुनेर आफ्नो भनाई राखेका सापकोटाले उत्पादन र आत्मनिर्भरतामा जोड दिए । जनताको बलमा विश्वलाई चकित पार्ने जनयुद्ध सम्भव भएको बताउँदै सापकोटाले फेरि जनताकै बलमा सामाजिक न्याय सहितको वैज्ञानिक समाजवाद स्थापनाका लागि पहल लिइने बताए ।
आफूले लगातार तीन पटक जिताएर पठाएका नेताले प्रतिनिधि सभाको सभामुखका रुपमा र पार्टीको उपाध्यक्षका रुपमा निभाएको भूमिकाको प्रशंसा गर्दै स्थानीयले सडक, गुठि जग्गा, स्वास्थ्य र शिक्षाका विषयमा राज्य गम्भीर हुनु पर्ने विषय राखेका थिए । निर्णायक तहमा रहेका नेताले आफ्ना विषयको कार्यान्वयन गर्ने विश्वासका साथ सुझाव र गुनासो राखेको उनीहरुको भनाई थियो ।
अभियान उद्घाटनका क्रममा गाउँपालिका अध्यक्ष राजु लामाले कृषिलाई प्राथमिकता दिएर उत्पादनमा विशेष जोड दिइएको बताए । उनले सामान्य विषयमा गाउँपालिकाले नै निर्णय लिन सक्ने भएपनि ठूला बजेटमा हुने कार्यक्रम केन्द्र र प्रदेशतहबाट सहयोग आए मात्रै सम्भव हुने बताए ।
यसैविच माओवादी अध्यक्ष प्रचण्डले पार्टी कार्यालय पेरिसडाँडाबाट उद्घाटन गरेसँगै देशभरका सबै वडामा अभियान सुरु भएको छ । अभियान तीन महिना सम्म जारी रहने माओवादीले जनाएको छ । गत साउन १७ देखि २१ गतेसम्म काठमाडौंमा सम्पन्न केन्द्रीय समितिको बैठकले भदौ १६ गतेदेखि “जनतासँग माओवादी विशेष रुपान्तरण अभियान” सञ्चालन गर्ने निर्णय गरेको थियो । यो अवधिमा कम्तिमा २५ लाख मतदातासँग प्रत्यक्ष भेटघाट गरी सरकारले सुशासन, समृद्धि र सामाजिक न्यायको क्षेत्रमा गरेका कामहरुको बारेमा जानकारी गराउने कार्यक्रम रहेको पार्टी उपाध्यक्ष समेत रहेका प्रवक्ता सापकोटाले बताए ।
