प्रकृतिमा पाइने बाँस बहुउपयोगी वनस्पती हो । बाँस पृथ्वीमा सबैभन्दा छिटो बढ्ने बिरुवा अन्तर्गत पर्दछ । यसका केही प्रजातिहरू एक दिनमा ९१ सेन्टिमिटर (३६ इन्च)सम्म बढ्न सक्छन् । यो निर्माण, फर्निचर निर्माण, कागज उत्पादन, कपडा, संगीत वाद्ययंत्र र खाद्य स्रोत(तामा) को रूप मा प्रयोग गरिन्छ ।
यसको हलुका वजन भएता पनि यो अविश्वसनीय रुपमा बलियो र टिकाऊपूर्ण हुन्छ । बाँसका केही प्रजातिहरु स्टिल भन्दा पनि बलिया हुन्छन्, जसबाट उत्कृष्ट निर्माण सामग्री बनाउन सकिन्छ । बाँस यसको पर्यावरणीय लाभका लागि परिचित छ । यो एक उच्च नवीकरणीय स्रोत हो । अरु जातका रूखहरु २० ७० वर्षसम्ममा मात्र काट्ने वेला हुन्छ भने यो ३–५ वर्षमा काटेर प्रयोग गर्न सकिन्छ । बाँसले अन्य वनस्पतीको तुलनामा ३० प्रतिशत बढी अक्सिजन दिन्छ र बढी कार्बन डाइअक्साइड सोस्छ ।
बाँसको व्यापक जरा प्रणालीले भूक्षय तथा पहिरो रोक्न मद्दत गर्दछ । अन्तरसम्बन्धित जराहरूको बाक्लो सञ्जालले ढलान र नदी किनारहरूलाई स्थिर बनाउने कामका लागि प्रभावकारी उपकरण बनाउँछ । बाँसको जङ्गलले बिभिन्न प्रकारका वनस्पति र जनावर प्रजातिका लागि बासस्थान प्रदान गर्न र जैविक विविधतालाई कायम राख्न मद्दत गर्छन् ।
यसको औद्योगिक र निर्माण प्रयोगको अतिरिक्त, कलिला बाँसका मुनाहरुलाई नेपाल लगायतका एशियाली मुलुकमा तामा(तरकारी र अचार)को रुपमा प्रयोग गर्ने गरिन्छ । धेरैजसो एशियाली संस्कृतिहरूमा बाँसको सांस्कृतिक र प्रतीकात्मक महत्त्व छ । यसलाई प्रायः समृद्धि र सौभाग्यको प्रतीकको रूपमा हेरिन्छ । बाँस विश्वका विभिन्न भागहरूमा पाइन्छ, जसमध्ये अधिकांश प्रजातिहरू एशियामा पाइन्छन् । यद्यपि, यो अफ्रिका, अष्ट्रेलिया, अमेरिका र युरोपका क्षेत्रहरूमा पनि फेला पार्न सकिन्छ ।
