७ पुस, सिन्धुपाल्चोक । बलेफी गाउँपालिका स्तरीय छैटौं राष्ट्रपति रनिङ शिल्ड प्रतियोगिता २०८१ को उपाधि बाल शिक्षा माध्यमिक विद्यालय, खाडीचौरले हात पारेको छ । प्रतियोगितामा आनन्द माध्यमिक विद्यालय, जलविरे दोस्रो स्थानमा र बलेफी माध्यमिक विद्यालय तेस्रो स्थानमा पुगेका छन्।
यो प्रतियोगिता बागमती प्रदेश सभा सदस्य सरलसहयात्री पौडेलको प्रमुख आतिथ्यतामा बलेफी गाउँपालिका वडा नं. ४ स्थित जालपादेवी माध्यमिक विद्यालय, विञ्ज्यालमा सुरु भएको थियो। बलेफी गाउँपालिकाद्वारा आयोजित यो दुईदिने प्रतियोगितामा गाउँपालिका भित्रका ११ वटा माध्यमिक विद्यालयहरूको सहभागिता रहेको थियो।
समापन समारोहमा बलेफी गाउँपालिका अध्यक्ष गंगा बहादुर तामाङले विजयी खेलाडीहरूलाई शिल्ड, मेडल, तथा नगद पुरस्कार वितरण गर्दै बधाई दिए । कार्यक्रममा जिल्ला समन्वय समिति, सिन्धुपाल्चोकका उपप्रमुख पदमनाथ नेपाल, बलेफी गाउँपालिका उपाध्यक्ष सुरु लामा तामाङ र वडा अध्यक्षहरूको उपस्थिति रहेको थियो।
