२२ माघ, काठमाडौं । बाल विवाह र महिला हिंसा जस्ता सामाजिक कुप्रथाहरूलाई निरुत्साहित गर्ने उद्देश्यले निर्माण गरिएको नेपाली चलचित्र ‘जुना: एक व्यथा’ यही माघ २५ गतेदेखि देशभरका सिनेमा हलहरूमा प्रदर्शन हुँदैछ। यसका लागि अग्रिम टिकट बुकिङ खुला गरिएको छ।
गोदावरी फिल्म प्रोडक्सन एण्ड रिसर्च सेन्टर प्रा.लि.को ब्यानरमा निर्माण भएको यस चलचित्रमा जीवन सेञ्चुरीको निर्देशन रहेको छ भने दीपकप्रसाद घिमिरे निर्माता रहेका छन्। चलचित्रमा अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, कमल बोहोरा, अस्मिता बस्नेत, खगेन्द्र न्यौपाने, विकास आनन्द, इन्द्र बिके र केशव अधिकारीको दमदार अभिनय समावेश छ।
निर्माता घिमिरेका अनुसार, चलचित्रले ‘बाल विवाह सामाजिक अपराध हो। त्यसकारण यसलाई अन्त्य गरौं’ भन्ने नारालाई अघि सारेको छ। उनले भने, ‘नेपाली समाजमा व्याप्त महिला हिंसा, बाल विवाह, अनमेल विवाह, बहुविवाह, बलात्कार, जबरजस्ती करणी, छाउपडी जस्ता कुप्रथालाई अन्त्य गर्ने राष्ट्रिय आवश्यकतालाई यस चलचित्रको माध्यमबाट सम्बोधन गर्ने प्रयास गरिएको छ।’
चलचित्रको छायांकन पर्वत जिल्लाको सालिजा ओख्रेनी क्षेत्रमा गरिएको हो। यसमा राजबहादुर सानेको कथा, बीबी अनुरागी र रमेश सेञ्चुरीको संगीत, जीवन सेञ्चुरी र भीमबहादुर पौडेलको शब्द, तथा अञ्जु पन्त, पूर्णकला बिसी र यदुराई लकान्द्रीको स्वर रहेको छ। सिनेमाटोग्राफी रामेश्वर हुमागाईंले गरेका छन्।
चलचित्रको वितरण एप्पल इन्टरटेनमेन्ट, रिच इन्टरटेनमेन्ट र एफडी कम्पनीले गर्नेछन्। यसअघि, चलचित्र विशेष कार्यक्रममार्फत प्रदर्शन गरिएको थियो, जहाँ पूर्व राष्ट्रपति विद्यादेवी भण्डारी, राष्ट्रिय सभा र प्रतिनिधि सभाका सांसदहरू, विज्ञ, लेखक, समालोचक लगायतले चलचित्र हेरेर सकारात्मक प्रतिक्रिया दिएका थिए। ‘जुनास् एक व्यथा’ ले नेपाली समाजमा चेतनाको सन्देश पुर्याउने विश्वास गरिएको छ।
