२४ माघ, सिन्धुपाल्चोक । अरूका पीडामा गीत गाएर सात्वना दिने टुङ्ना गायक वीरबहादुर विक आफैं जीवनको सबैभन्दा कठिनाइमा परेका छन् । अचानक भएको आगलागीले उनको सिरानीमात्र होइन, आश्रय नै जलेर खरानी भएको छ। अहिले उनी सहयोगको अपिल गर्दै सहयोगी हातहरूको प्रतीक्षामा छन्।
सिन्धुपाल्चोकको भोटेकोसी गाउँपालिका वडा नं १, काङलाङका विक आँखा देख्दैनन् । गीत गाएर परिवार पालिरहेका उनको परिवार अचानक लागेको आगलागीका कारण सम्पूर्ण रूपमा विचल्लीमा परेको छ। घर नजिकैको पिठो पिस्ने मिलमा तार सट भई लागेको आगोले उनको भान्छाघर, सुत्ने टहरो र मिल पूर्ण रूपमा नष्ट गरिदिएको छ। स्थानीय शिक्षक पशुराम गौतमका अनुसार आगलागीले लत्ताकपडा, खाद्यान्न, भाँडाकुडा सबै खरानी बनाइदिएको छ। वर्षौंसम्म गीत गाएर संकलित रकमले बनाइएको टहरो पनि आगलागीको एक झिल्कोमै ध्वस्त भयो। पहिरोले थिलथिलो बनाएको जमिनमा गरिरहेको सानो खेतीले परिवार पाल्न मुस्किल भइरहेको बेला, बस्ने घर नै जलेपछि विकका लागि बाँच्नै गाह्रो भएको छ।
सहयोगी हातहरुको तात्किालीन सहयोग
सहयोगी हातहरू नामक संस्थाले तत्काल राहतस्वरूप केही सामग्री हस्तान्तरण गरेको छ भने दक्षिण कोरियामा कार्यरत मानेस्वारा निवासी युवा कुबेर भण्डारीले ७ हजार ७ सय ७७ रुपैयाँ सहयोग गरेका छन्। तर यो सहयोग अपुग छ, जीवन पुनःस्थापना गर्न अझ धेरै हातहरू अघि आउन आवश्यक छ।
आँखा नदेख्ने, तर संसारलाई संगीतको उज्यालो दिएका वीरबहादुर विक अहिले पीडा, अभाव र ठण्डिको मारमा छन्।
