२७ माघ, काठमाडौं – प्रतिनिधि सभा सदस्य माधव सापकोटा ‘सुबोध’ ले सिन्धुपाल्चोकको बन्देउ-लिपिङ सडक खण्डको स्तरोन्नति तत्काल थाल्न सरकारको गम्भीर ध्यानाकर्षण गराएका छन्। आइतबार प्रतिनिधि सभामा सम्बोधनका क्रममा सांसद सापकोटाले चालु आर्थिक वर्षमा सो सडक सुधारका लागि विनियोजित १ अर्ब २३ करोड रुपैयाँ हालसम्म कार्यान्वयनमा नआएकोप्रति असन्तुष्टि व्यक्त गरे।
तातोपानी भन्सार पुग्ने सडक मर्मतमा बेवास्ता
नेपाल-चीन व्यापारका लागि प्रमुख मार्ग, अरनिको लोकमार्गको यो सडकखण्ड स्तरोन्नति ढिलाइ हुनु गम्भीर विषय भएको सांसद सापकोटाले बताए। सरकारको २१ अर्ब ७४ करोड राजश्व संकलनको लक्ष्य रहेको तातोपानी भन्सारमा पुग्न यो सडक महत्वपूर्ण भए पनि आवश्यक मर्मत सम्भार र स्तरोन्नतिका लागि आवश्यक तयारी नगरेको भन्दै उनले आक्रोश व्यक्त गरे।
वर्षा अघिनै तयारी गर्न आग्रह
गत असोज ११ र १२ गतेको भीषण वर्षा र बाढीपहिरोका कारण अरनिको लोकमार्गको बन्देउ-बाह्रबिसे खण्डमा ठूला क्षति पुगेको थियो। सांसद सापकोटाले बाह्रबिसेदेखि लिपिङसम्मको सडक जोखिमपूर्ण अवस्थामा रहेको, खागदल, लार्चा र लिपिङ खोलाका पक्की पुल बगेपछि हाल अस्थायी रुपमा मात्रै यातायात सञ्चालन भइरहेको जानकारी गराए। उनले आउँदो वर्षात अघि नै सडक मर्मतका लागि आवश्यक पूर्वतयारी गर्न तत्काल बोलपत्र आव्हान गरी आवश्यक प्रवन्ध मिलाउन आग्रह गरे।
सांसद सापकोटाको सम्बोधन: “सम्माननीय सभामुख महोदय, गत असोज ११ र १२ गतेको भीषण वर्षा र त्यसपछिको बाढीपहिरोले अरनिको लोकमार्गलाई ठूलो क्षति पुर्यायो। बन्देउ-बाह्रबिसे खण्डका ठाउँठाउँमा सडक एकतर्फी भएका छन् भने बाह्रबिसेदेखि लिपिङसम्मको सडक जोखिमपूर्ण अवस्थामा छ। खागदल, लार्चा र लिपिङ खोलाका पक्की पुल बगेपछि हाल अस्थायी रूपमा मात्रै यातायात सञ्चालन भइरहेको छ। चालु आर्थिक वर्षमा यस सडकका लागि १ अर्ब २३ करोड बजेट विनियोजन भएको थियो, तर हालसम्म पनि बोलपत्र आव्हान हुन सकेको छैन। यस आर्थिक वर्षमा २१ अर्ब ७४ करोड राजश्व संकलन गर्ने लक्ष्य राखेको तातोपानी नाका पुग्ने यो सडक मर्मत सम्भारका लागि तत्काल बोलपत्र आह्वान गरी वर्षात अगाडि नै आवश्यक प्रवन्ध मिलाउन सम्माननीय सभामुख मार्फत नेपाल सरकारको गम्भीर ध्यानाकर्षण गराउँछु। धन्यवाद। लाल सलाम।”
