३० माघ, सिन्धुपाल्चोक। नेपाल चीनबिचको व्यापारिक तातोपानी नाका नजिक लिपिङ खोलामा बेलिब्रिज सञ्चालनमा आएको छ । गत असोजमा पक्कि पुल बगाएको स्थानमा नेपाली सेनाको प्राविधिक टोलिले निर्माण गरेको बेलिब्रिज सञ्चालनमा आएको हो। नाका जोड्ने यो बेलिब्रिज सेनाको बृजिङ युनिटले पाँच दिनमै निर्माण सम्पन्न गरेको हो।
जडान सुरु गरेको दिन प्रतिनिधिसभा सदस्य माधव सापकोटा “सुबोध”ले बेलिब्रिज जडान कार्यको निरीक्षण गर्दै आवश्यक सहजीकरणको प्रतिबद्धता व्यक्त गरेका थिए। नेपाली सेनाको प्राविधिक सहयोगमा ४५.७२ मिटर लामो यो पुल आइतबार साँझ तयार भएको थियो। सोमबार सेनाका नम्बर २६ बाहिनीपति सहायक रथी अशोक गुरुङले २८ टन भारवहन क्षमताको बेलिब्रिजको उद्घाटन गरे।
बेलिब्रिज सञ्चालनमा आएपछि सीमाक्षेत्रमा यातायात पुनः सञ्चालन भएको छ। गत असोजमा लिपिङ खोलामा आएको बाढीले पक्की मोटरेबल पुल बगाएपछि यातायात अवरुद्ध भएको थियो। त्यसपछि ह्युमपाइप राखेर अस्थायी रूपमा सवारी सञ्चालन गरिएको थियो। नयाँ बेलिब्रिज निर्माणपछि सीमावासी र व्यवसायी उत्साहित भएका छन्।
भोटेकोशी–२ का वडाध्यक्ष कुमार श्रेष्ठका अनुसार यसअघि अस्थायी रूपमा कच्ची सडक प्रयोग गर्दा जोखिमपूर्ण यात्रा गर्नुपरेको थियो। बेलिब्रिज सञ्चालनमा आएसँगै तातोपानी नाका पुनः सञ्चालनमा आएको प्रमुख जिल्ला अधिकारी किरण थापाले जानकारी दिए। २०७२ को भूकम्प, भोटेकोशी बाढीपहिरो र २०७३ मा आएको बाढीपछि पटक–पटक पुल पुनर्निर्माणका प्रयास भइरहे पनि असोज १२ को बाढीले लिपिङ खोलाको पक्की पुल पूरै बगाएको थियो। सांसद सापकोटाले यो विषयमा संसदमा सरकारको ध्यानाकर्षण गराएपछि काम अघि बढेको थियो ।
