३० माघ, सिन्धुपाल्चोक । चौतारा साँगाचोकगढी नगरपालिकाले जंगल तथा सार्वजनिक स्थानमा डढेलो लगाउने व्यक्तिहरूको खोजी गरी कानुनी कारबाही गर्ने निर्णय गरेको छ। सोमबार नगरपालिकाले वन डढेलो नियन्त्रणसम्बन्धी सामुदायिक वन उपभोक्ता समितिका पदाधिकारीहरूको एक दिवसीय अभिमुखीकरण कार्यक्रममार्फत यस्तो निर्णय सार्वजनिक गरिएको हो ।
नगर प्रमुख कृष्णप्रसाद सापकोटाले वन उपभोक्ता समितिलाई कृषि समूह सरह मान्यता दिइएको बताउँदै, वन विकास तथा आयआर्जनमा टेवा पुर्याउने कार्यक्रम अघि सारिएको जानकारी दिए। डढेलो लगाउने कार्य निरुत्साहित गर्न नगरले कडा कदम चाल्ने मेयर सापकोटाले बताए ।
प्रमुख प्रशासकीय अधिकृत वैकुण्ठ सापकोटाले विभिन्न बहानामा जंगलमा आगलागी गराउनु गम्भीर दण्डनीय अपराध भएको उल्लेख गर्दै दोषीलाई कडाभन्दा कडा कारबाही गरिनुपर्ने बताए। उनले वन उपभोक्ता समिति स्वायत्त संस्था भए पनि वन नियम र कानुनको अधिनमा रहेर काम गर्न आग्रह गरे।
जिल्ला डिभिजनल वन अधिकृत मदन कंडेलले सामुदायिक वन उपभोक्ता समितिहरूलाई समयमै साधारण सभा गर्न, वन कार्ययोजना नवीकरण गर्न र बैंक खातामार्फत मात्रै आर्थिक कारोबार गर्न सुझाव दिए।
वनमा डढेलो लगाउनेलाई २० हजारदेखि ५० हजार रुपैयाँसम्म जरिवाना वा २ देखि ५ वर्षसम्म कैद सजाय हुने कानुनी व्यवस्था रहेको छ। नगरपालिकाभित्र ९६ वटा सामुदायिक वन उपभोक्ता समिति सक्रिय छन्।
चौतारा साँगाचोकगढी नगरपालिकाले वन संरक्षणका लागि चालेको यो कदम प्रशंसा भएको छ। समुदायलाई सचेत बनाउँदै वन अपराधविरुद्ध कडा नीति अपनाउनु स्थानीय सरकारको प्रभावकारी भूमिका हो। जलवायु परिवर्तन र वनक्षयको चुनौती बढिरहेको अवस्थामा यस्तो पहलले अन्य स्थानीय तहलाई पनि प्रेरणा दिने अपेक्षा गरिएको छ।
