१ फागुन, काठमाडौं। नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले जनयुद्धको प्रेरणा सयौं वर्षसम्म रहने बताएका छन्। ३० औं जनयुद्ध दिवसको अवसरमा पार्टी केन्द्रीय कार्यालय पेरिसडाँडामा आयोजित कार्यक्रममा सम्बोधन गर्दै उनले यस्तो धारणा राखेका हुन्।
“जनयुद्ध नेपालको इतिहासमा सबैभन्दा ठूलो युगान्तकारी परिवर्तन गराउने परिघटना थियो,” उनले भने, “यसले आज मात्र होइन, सयौं वर्षसम्म पनि प्रेरणा दिइरहने छ। यसलाई कसैले मेटाउन सम्भव छैन, जसले मेटाउने प्रयास गर्छ, ऊ खरानी हुनेछ।” जनयुद्ध दिवस राष्ट्रिय दिवस नै भएको उल्लेख गर्दै अध्यक्ष प्रचण्डले शान्ति प्रक्रिया नटुंगिएको कारण देखाएर अदालतले स्थगन गरे पनि यसलाई राष्ट्रिय दिवसको रूपमा स्थापित गरेरै छाड्ने दृढता व्यक्त गरे।
“हामी अहिले संघीय लोकतान्त्रिक गणतन्त्रअन्तर्गत सुशासन, सामाजिक न्याय र समृद्धिको अभियानमा छौं। यसको मुख्य प्रेरणा जनयुद्ध नै हो,” उनले भने, “हामी जनयुद्ध र जनआन्दोलनबाट प्राप्त उपलब्धिलाई रक्षा र विकास गर्दै संघीय लोकतान्त्रिक गणतन्त्र हुँदै समाजवादको आधार तयार गर्ने यात्रामा छौं।” जनयुद्ध र जनआन्दोलनको बलमा बनेको संविधानका स्थापित मान्यतालाई एकथरि तत्वले अस्वीकार गर्ने र जनताका अधिकार कुण्ठित गर्ने प्रयास गरिरहेको उल्लेख गर्दै उनले यी सबै प्रयास असफल पार्न निरन्तर संघर्ष गरिरहेको बताए। “अहिले पनि दुई वर्ग र प्रवृत्तिका बीचमा संघर्ष चलिरहेको छ। हामीले धेरै वर्ष पहिले संघीय लोकतान्त्रिक गणतन्त्रमा पुगे पनि प्रतिक्रियावादीहरूले जनताको गणतन्त्र हुन नदिने प्रयास हुनेछ भनेर आँकलन गरेका थियौं, आज त्यही स्थिति बनेको छ,” उनले भने, “एकथरि तत्व संविधानका अग्रगामी प्रावधान उल्ट्याउने प्रयासमा छन्, तर हामी यसलाई समाजवादी गणतन्त्रमा लैजान चाहन्छौं। यो संघर्ष जारी छ।”
विगतमा भएका कतिपय कमजोरीको आत्मसमीक्षा गर्दै उनले पार्टी फेरि पनि देशका श्रमजीवी वर्ग, महिला, दलित, आदिवासी जनजाति, मधेशी, मुस्लिमलगायत उत्पीडित समुदाय र क्षेत्रका एजेण्डामा फर्किएको उल्लेख गरे। पछिल्लो समय सरकारको नेतृत्व गर्दा सुशासन, सामाजिक न्याय र समृद्धिका पक्षमा गरिएको ऐतिहासिक थालनीलाई जनताले सकारात्मक रूपमा लिएको बताए। आफ्नो वर्ग र समुदायतर्फ फर्किंदै जनताका एजेण्डालाई दृढतापूर्वक अघि बढाउने र जनतासँगको एकतालाई बलियो बनाउने सङ्कल्प गरेको उल्लेख गर्दै उनले यसले जनतामा सकारात्मक प्रभाव परेको बताए।
अध्यक्ष प्रचण्डले जनयुद्धको तयारी, सञ्चालन, शान्ति प्रक्रिया, संविधान निर्माण र गणतन्त्र घोषणाको ऐतिहासिक नेतृत्व गर्ने अवसर पाउनु आफ्नो लागि गर्वको विषय भएको उल्लेख गरे। साथै, क्रान्तिकारी शक्तिलाई अझ बलियो बनाउन जनयुद्धका सहयात्रीलगायत सबै कम्युनिस्ट क्रान्तिकारीहरूलाई एकताको अपिल गरे। क्रान्तिकारी शक्तिलाई बलियो बनाएर मात्र प्रतिक्रियावादीका षड्यन्त्र असफल बनाउन सकिने र जनताले देखेको क्रान्तिको सपना पूरा गर्न सकिने उल्लेख गर्दै उनले क्रान्तिकारी शक्तिहरूलाई एकता र ध्रुवीकरणका लागि आह्वान गरे। राजनीतिक रूपमा युगान्तकारी उपलब्धि प्राप्त गरे पनि जनताले प्रत्यक्ष देख्ने र भोग्ने गरी जीवन बदल्न नसकिएको स्वीकार्दै उनले तलैदेखि समाजवादी क्रान्तिको जग कसरी बसाउन सकिन्छ भनेर नयाँ सङ्कल्प गर्ने बेला आएको बताए।
“जनताको घर-आँगनमा उज्यालो ल्याउने सङ्कल्प आजको मुख्य कार्यभार बनेको छ,” उनले भने, “भर्खरै सम्पन्न केन्द्रीय बैठकले त्यस दिशातिर पार्टीलाई अघि बढाएको छ। म सबैलाई यो अभियानमा लाग्न अपिल गर्छु।”
