माओवादीले फागुन १२ देखि चैत्र ८ सम्म ‘जनतासँग माओवादी’ अभियान सञ्चालन गर्ने
प्रमुख विपक्षी दल नेपाल कम्युनिस्ट पार्टी (माओवादी केन्द्र) ले फागुन १२ देखि चैत्र ८ सम्म झापा देखि कञ्चनपुरसम्म 'जनतासँग माओवादी' अभियान सञ्चालन गर्ने घोषणा गरेको छ।
पालुवान्युज, २०८१ फागुन ९ गते १८:४२ मा प्रकाशित
९ फागुन, काठमाडौं – प्रमुख विपक्षी दल नेपाल कम्युनिस्ट पार्टी (माओवादी केन्द्र) ले फागुन १२ देखि चैत्र ८ सम्म झापा देखि कञ्चनपुरसम्म ‘जनतासँग माओवादी’ अभियान सञ्चालन गर्ने घोषणा गरेको छ।
माओवादीका उपाध्यक्ष एवं प्रवक्ता अग्निप्रसाद सापकोटाका अनुसार, पार्टीले संगठन सुदृढीकरण, जनचेतना अभिवृद्धि र सामाजिक न्यायको प्रवर्द्धनका लागि यो अभियान चलाउन लागेको हो। अभियानको उद्घाटन फागुन १२ गते झापाबाट हुनेछ र यो चैत्र ८ गते कञ्चनपुरमा सम्पन्न हुनेछ। अभियानका मुख्य उद्देश्यहरूमा संविधानको रक्षा, सुशासनको प्रवर्द्धन, भ्रष्टाचारविरोधी संघर्ष र समाजवादी क्रान्तिको आधार तयार गर्नु रहेको छ।
फागुन १० र ११ गतेस्थानीय तहका जनप्रतिनिधिहरूको राष्ट्रिय भेला
पार्टीले फागुन १० र ११ गते स्थानीय तहका जनप्रतिनिधिहरूको राष्ट्रिय भेला आयोजना गर्ने निर्णय गरेको छ। भेलामा समाजवाद उन्मुख पूर्वाधार निर्माणसम्बन्धी अभिमुखीकरण कार्यक्रम सञ्चालन गरिनेछ। स्थानीय तहका प्रमुख, उपप्रमुख, अध्यक्ष, उपाध्यक्ष र पार्टीका अध्यक्षहरूको सहभागिता रहनेछ।
अभियानका प्रमुख उद्देश्यहरू
संविधानको रक्षा गर्दै प्रतिगमनको खतराविरुद्ध खबरदारी गर्नु।
सुशासन, सामाजिक न्याय र समृद्धिको बाटो अवलम्बन गर्दै समाजवादको आधार तयार गर्नु।
भ्रष्टाचार, दलाली तथा विचौलियावादको विरोध गर्दै सरकारको गलत प्रवृत्तिको भण्डाफोर गर्नु।
लोकतन्त्रविरोधी तथा दलीय तानाशाही प्रवृत्तिको विरोध गर्दै सुकुम्बासी, भूमिहीन, अव्यवस्थित बसोबासीका समस्याको समाधान गर्न दबाब सिर्जना गर्नु।
जातीय विभेद, महिला हिंसा तथा उत्पीडित वर्गका अधिकार सुनिश्चित गर्न संघर्ष गर्नु।
सहकारी ठगी प्रकरणमा सरकारको भेदभावपूर्ण रवैयाको विरोध गर्दै पीडितलाई न्याय दिलाउने वातावरण सिर्जना गर्नु।
मिटरब्याज पीडितका समस्याको समाधानका लागि आवाज उठाउनु।
राष्ट्रियता, सार्वभौमिकता, भौगोलिक अखण्डता तथा स्वाधीनताको पक्षमा दृढ अडान लिनु।
संविधान संशोधनको नाममा उत्पीडित समुदायको अधिकार खोस्ने षड्यन्त्रविरुद्ध संघर्ष गर्नु।
राष्ट्रिय भाषाको संरक्षण, सार्वजनिक सेवा प्रवाहमा सुधार, कृषि उत्पादन प्रवर्द्धन, ग्रामीण अर्थतन्त्रको सशक्तीकरण तथा वैदेशिक रोजगारीमा हुने शोषणको अन्त्यका लागि आवाज उठाउनु।
प्रेस तथा अभिव्यक्ति स्वतन्त्रतामाथि अंकुश लगाउने प्रयासको विरोध गर्दै संचार स्वतन्त्रताको पक्षमा दृढ अडान लिनु।
हुलाकी मार्गको शीघ्र निर्माण तथा ग्रामीण उद्यमशीलताको प्रवर्द्धनका लागि सरकारलाई दबाब दिनु।
प्राकृतिक प्रकोपका पीडितहरूको राहत, पुनर्स्थापना तथा जलवायु परिवर्तनका असरहरूबारे जनचेतना अभिवृद्धि गर्नु।
