१३ फागुन, सिन्धुपाल्चोक। राष्ट्रिय सभा अध्यक्ष नारायण प्रसाद दाहालले व्यवस्था परिवर्तन भए पनि जनताको अवस्था रूपान्तरण हुन नसक्दा परिवर्तनविरोधी पश्चगामी शक्तिहरुले टाउको उठाउन खोजिरहेको बताएका छन् । सिन्धुपाल्चोकको बलेफी गाउँपालिकास्थित जालपादेवी माविको स्वर्ण जयन्ती समारोहलाई सम्बोधन गर्दै अध्यक्ष दाहालले जनतामा बढिरहेको निरासामाथि खेल्दै परिवर्तनविरोधी र पश्चगामी शक्तिहरूले टाउको उठाउने र गणतान्त्रिक व्यवस्थामाथि धावा बोल्ने षड्यन्त्र गरिरहेको बताए ।
जनताले खोजेको शिक्षा, स्वास्थ्य, रोजगारी र आर्थिक समृद्धि भएको चर्चा गर्दै अध्यक्ष दाहालले उत्पीडित वर्ग, जाति, लिङ्ग, क्षेत्र र समुदायका जनताले मौलिक हकको उपभोग गर्न नपाउँदा निरासा बढिरहेको बताए । “मौलिक हकको रूपमा प्रष्ट उल्लेख गरिएका शिक्षा, स्वास्थ्य, आवास, रोजगारी, खानेपानी लगायतका अधिकार उत्पीडित वर्ग, जाति, लिङ्ग, क्षेत्र र समुदायका जनताले खासै उपभोग गर्न नपाउँदा निरासा बढिरहेको छ”, अध्यक्ष दाहालले भने “जनतामा बढिरहेको निरासामाथि खेल्दै परिवर्तनविरोधी र पश्चगामी शक्तिहरूले फेरि टाउको उठाउने र संघीय लोकतान्त्रिक गणतान्त्रिक व्यवस्थामाथि नै धावा बोल्ने षड्यन्त्रप्रति भने हामी सबै सचेत हुन जरूरी छ।”
राष्ट्रको विकासको मेरूदण्ड शिक्षा भएको उल्लेख गर्दै अध्यक्ष दाहालले शिक्षित र दक्ष जनशक्तिले राष्ट्रको समग्र विकास र समृद्धिमा महत्वपूर्ण भूमिका खेल्ने बताए । शिक्षक, अभिभावक, विद्यार्थी र जनप्रतिनिधिहरूको साझा प्रयासबाट मात्रै शिक्षामा देखिएको अराजकता कम गर्न सकिने भन्दै उनले त्यसबाट मात्रै शैक्षिक गुणस्तर बढाउन र अनुशासित, कतर्व्यनिष्ठ जनशक्ति उत्पादन गर्न सकिने धारणा राखे ।
कार्यक्रममा संघीय सांसद माधव सापकोटा, संविधानसभा सदस्य केशब नेपाल, प्रदेश सभा सदस्य अमृता नेपाल, बलेफी गाउँपालिका अध्यक्ष गंगा बाहादुर तामाङ, उपाध्यक्ष सरु तामाङ, पूर्व अध्यक्ष केदार क्षेत्रीलगायतले धारणा राखेका थिए । विद्यालय व्यवस्थापन समितिका अध्यक्ष नारायण पराजुलीको अध्यक्षमा सम्पन्न कार्यक्रममा विद्यालय परिवारका साथै जिल्ला स्थित प्रशासन, सुरक्षा निकायका प्रमुख एवं स्थानीयको बाक्लो उपस्थिति रहेको थियो ।
