बिहीबार, सांसद सापकोटाको पहलमा श्री बाल शिक्षा माध्यमिक विद्यालय, खाडिचौर र श्री सेतीदेवी माध्यमिक विद्यालय, डाँडागाउँ का विद्यार्थीहरू संघीय संसद भवन पुगेका थिए। उनीहरूले प्रतिनिधि सभाको बैठक अवलोकन गर्दै संसदीय कार्यशैली नजिकबाट बुझ्ने अवसर पाए।
विद्यालयका शिक्षक, विद्यालय व्यवस्थापन समिति सदस्य, अभिभावक तथा जनप्रतिनिधिहरूको समेत सहभागिता रहेको कार्यक्रममा विद्यार्थीहरूले संसदीय प्रक्रियाको अनुभव लिने अवसर पाए। कक्षा ९ र १० का विद्यार्थीहरू सामाजिक शिक्षामा संघीय संसद र यसका क्रियाकलापबारे अध्ययन गर्नुपर्ने भएकाले यो अवलोकन भ्रमणले उनीहरूलाई लोकतान्त्रिक प्रक्रियाप्रति अभिरुचि बढाउने, नीति निर्माण प्रक्रियाको प्रत्यक्ष अनुभव दिलाउने तथा समसामयिक राजनीतिक घटनाक्रमबारे बुझ्न प्रेरित गर्ने अवसर प्रदान गरेको सांसद सापकोटाले बताए।
उनले निर्वाचन क्षेत्रका विद्यालयमा गएर संसद र सांसदको भूमिकाबारे छलफल तथा अन्तरक्रिया गर्दै आएका छन्। साथै, विद्यार्थीहरूलाई संसद भवन ल्याई प्रत्यक्ष अवलोकन गराउँदै ‘विद्यालयमा सांसद, संसदमा विद्यार्थी’ नामक कार्यक्रम सञ्चालन गर्दै आएका छन्।
सांसद सापकोटाले संसदीय प्रक्रियासँग विद्यार्थीहरूलाई जोड्ने यस्ता कार्यक्रमहरूले भावी पुस्तामा जिम्मेवार नागरिक चेतना विकास गर्न महत्वपूर्ण भूमिका खेल्ने विश्वास व्यक्त गरे। साथै, उनले संसद बैठकमा सम्बोधन गर्दै दुबै विद्यालयका विद्यार्थी र विद्यालय परिवारलाई स्वागत समेत गरेका थिए।
सांसद माधव सापकोटाको समन्वयमा सम्पन्न यो अवलोकन कार्यक्रम विद्यार्थीहरूको ज्ञानवृद्धि, लोकतान्त्रिक मूल्य-मान्यता प्रति जागरूकता र व्यवहारिक शिक्षा प्रदान गर्ने महत्त्वपूर्ण अवसर बनेको सहभागी विद्यालय व्यवस्थापन समितिका पदाधिकारीहरूले बताएका छन्।
अवलोकन भ्रमणका क्रममा विद्यार्थीहरूले सभामुख देवराज घिमिरे, सांसद माधव सापकोटा लगायत अन्य नेताहरूसँग संक्षिप्त अन्तरक्रिया गरेका थिए। कार्यक्रमको क्रममा सामूहिक फोटो सेसन समेत गरिएको थियो, जसले विद्यार्थीहरूको अनुभवलाई अझ अविस्मरणीय बनाएको बाल शिक्षा माविका व्यवस्थापन समिति अध्यक्ष ज्ञानेन्द्र नेपाल ले बताए।
यसैबीच, अवलोकन भ्रमणमा सहभागी दुवै विद्यालयले सांसद सापकोटालाई यो महत्वपूर्ण अवसर उपलब्ध गराएकोमा धन्यवाद व्यक्त गरेका छन्। भ्रमणपछि विद्यालयले भनेका छन् “संसदमा विद्यार्थी” कार्यक्रम अन्तर्गत सिन्धुपाल्चोक क्षेत्र नं. १ का प्रतिनिधिसभा सदस्य माननीय माधव सापकोटाको समन्वयमा २०८१ फागुन २२ गते विद्यालयका कक्षा १० का विद्यार्थी, सामाजिक विषय अध्यापन गर्ने शिक्षकहरू र विद्यालय प्रशासनलाई संसद अवलोकन गर्ने अवसर प्रदान गर्नु भएकोमा हार्दिक आभार व्यक्त गर्दछौं।”
कार्यक्रममा वाग्मती प्रदेश सभा सदस्य अमृता नेपाल, बलेफी गाउँपालिकाका अध्यक्ष गंगा बहादुर तामाङ, स्थानीय जनप्रतिनिधिहरू समेतको उपस्थिति रहेको थियो।
