२ चैत, काठमाडौं । राष्ट्रिय प्रकोप व्यवस्थापन सञ्जाल नेपाल (डिमान) को १५औं साधारण सभा तथा ५औं अधिवेशन सम्पन्न भएको छ। फागुन २८ गते काठमाडौंमा सम्पन्न अधिवेशनले सूर्य बहादुर थापाको अध्यक्षतामा १४ सदस्यीय केन्द्रीय कार्य समिति निर्विरोध निर्वाचित गरेको छ।
नयाँ कार्य समितिमा उपाध्यक्षमा सान्त्वना केसी देवकोटा, महासचिवमा वरिष्ठ अधिवक्ता विष्णु प्रसाद तिमिल्सिना, उपमहासचिवमा श्रीधर न्यौपाने, कोषाध्यक्षमा कल्पना तिवारी र सदस्यहरूमा वैजनाथ चौधरी, प्रकाश कोइराला, प्रकाश सारु, माधव प्रधान, एकराज छत्कुली, गीता अधिकारी, गीता पाण्डे, रुपेन्द्र बस्नेत र विनोद सुनार रहेका छन्।
अधिवेशनको उद्घाटन सञ्जालका अध्यक्ष सूर्य बहादुर थापाले गरेका थिए। कार्यक्रममा स्थानीयकरण सम्बन्धी छलफल आयोजना गरिएको थियो भने उद्घाटन सत्रमा विपद् उत्थानशीलता, पुल फण्ड, स्थानीय संघसंस्थाको क्षमता विकास र दिगोपनाको विषयमा प्रस्तुति दिइएको थियो। नीति निर्माण र कार्यान्वयनका विषयमा भएको छलफलमा वक्ताहरूले विपद् व्यवस्थापन सम्बन्धी विभिन्न कानुन र नीति बने पनि कार्यान्वयनमा समस्या रहेको औंल्याए। परियोजनाको सन्दर्भमा दातृ निकायबाट प्राप्त रकम विभिन्न तह हुँदै जाँदा समुदायस्तरमा न्यून रकम मात्र पुग्ने र वास्तविक लाभ समुदायले कम पाउने अवस्था रहेको अनुभूति जानकारी गराइएको थियो ।
नेपालमा विपद् जोखिम न्यूनीकरण (डीआरआर) प्रमुख मुद्दाको रूपमा रहेको सन्दर्भमा यो सञ्जालले विपद् व्यवस्थापनको क्षेत्रमा सक्रिय भूमिका निर्वाह गर्दै आएको छ। सञ्जालले विभिन्न गैरसरकारी संस्थाहरूलाई एकत्रित गरी विपद् व्यवस्थापनको क्षेत्रमा सशक्त आवाज उठाउँदै आएको र दातृ निकायको सहयोग बढीभन्दा बढी समुदायमा पुर्याउन प्रयास गरिरहेको जानकारी अधिवेशनमा गराइएको थियो । महाधिवेशनमा सातै प्रदेशमा क्रियाशील सदस्य संस्थाहरूको प्रतिनिधित्व रहेको थियो।
कार्यक्रममा नेपाल सरकारका पूर्वसचिव केदार न्यौपाने, डिपीनेट नेपालका अध्यक्ष डा. राजु थापा, नियर नेटवर्क एशियाकी फोकल व्यक्ति सायदा, नेपालका फोकल व्यक्ति सूर्य नारायण श्रेष्ठ, विपद् व्यवस्थापन विज्ञ रोहित यादव लगायत राष्ट्रिय तथा अन्तर्राष्ट्रिय नेटवर्क र महासंघका प्रतिनिधिहरूले अधिवेशनको सफलताको शुभकामना दिँदै नेपालको विपद् अवस्था, जोखिम न्यूनीकरण, पूर्वतयारी र स्थानीय स्तरमा प्रभावकारी कार्यान्वयनका लागि स्थानीयकरण र स्थानीय संघसंस्थाहरूको भूमिकाबारे महत्वपूर्ण विचार व्यक्त गरेका थिए।
नेपालमा विपद् जोखिम न्यूनीकरण प्रमुख चुनौतीको रूपमा रहेको र यसलाई सम्बोधन गर्न सञ्जालले निरन्तर प्रयास गरिरहेको सन्दर्भमा यो अधिवेशनले थप रणनीति र सहकार्यको आधार तयार गरेको अध्यक्ष थापाले बताए । उनले सातवटै प्रदेशमा पुगेर विपद जोखिम न्युनिकरण तथा व्यवस्थापनको क्षेत्रमा काम गरिरहेका सदस्य संस्थाहरुको क्षमता अभिवृद्धिको क्षेत्रमा काम गर्ने योजना रहेको जानकारी दिएका छन् ।
