५ चैत्र, काठमाडौं । नेकपा (माओवादी केन्द्र) का सांसद माधव सापकोटा सुबोधले रोजगारीका क्रममा इराकमा मृत्यु भएकी सिन्धुपाल्चोककी सुमिना तामाङको शव नेपाल ल्याउन सरकारसँग कानुनी र कूटनीतिक पहल गर्न आग्रह गरेका छन्। प्रतिनिधि सभाको सोमबारको बैठकमा बोल्दै उनले मृतक तामाङको परिवारलाई उचित क्षतिपूर्ति प्रदान गर्नुपर्ने माग पनि राखेका छन्।
दुई वर्षअघि रोजगारीका लागि इराक गएकी सुमिना तामाङको गत २ चैतमा मृत्यु भएको थियो। घरमा काम गर्ने क्रममा उनी भुइँमा ढलेकी थिइन् र तत्काल अस्पताल पुर्याइए पनि उपचारका क्रममा उनको निधन भएको हो। गैरकानूनी बाटोबाट इराक पुगेकी तामाङ गम्भीर रोग र कमजोर शारीरिक अवस्थाबाट ग्रसित थिइन्। उनलाई नेपाल फर्काउन खोज्दा दुई पटकसम्म एयरलाइन्सले स्वीकृति नदिएपछि हवाई टिकट रद्द भएको थियो।
हाल उनको शव नेपाल ल्याउन झन्डै दुई महिना लाग्ने बताइएको छ। नेपाल सरकारले प्रतिबन्ध लगाएको इराकमा एनआरएनएको तथ्यांकअनुसार २० हजारभन्दा बढी नेपाली कामदार कार्यरत रहेका छन्।
