चैत ५, सिन्धुपाल्चोक । सत्तारूढ दलहरूबीच राजनीतिक गठबन्धन कायम रहेको अवस्थामा सिन्धुपाल्चोकका तीन प्रमुख क्याम्पसहरूमा अखिल क्रान्तिकारीले ऐतिहासिक जित हात पारेको छ । नेपाल कम्युनिस्ट पार्टी (माओवादी केन्द्र) निकट अखिल (क्रान्तिकारी) का उम्मेदवारहरूले स्वतन्त्र विद्यार्थी युनियन (स्ववियु) निर्वाचनमा शानदार विजय हासिल गरेका हुन् । सोमबार सम्पन्न निर्वाचनमा जलविरे, हेलम्बु क्याप्पसमा र मनोनयनका क्रममा साँगाचोक क्षेत्रको जुगल क्याम्पसमा अखिल (क्रान्तिकारी) ले आफ्नो प्रभाव जमाउँदै गठबन्धनका प्रतिस्पर्धीहरूलाई पराजित गरेको हो। यो परिणामले जिल्लाको विद्यार्थी राजनीतिमा नयाँ तरंग ल्याएको छ।
जलविरे भ्याली क्याम्पसमा अखिल (क्रान्तिकारी) को सम्पूर्ण प्यानल विजयी
जलविरे भ्याली क्याम्पस, जलविरेमा भएको निर्वाचनमा अखिल (क्रान्तिकारी) का उम्मेदवारहरूले नेपाली कांग्रेस निकट नेपाल विद्यार्थी संघ (नेविसंघ) र नेकपा (एमाले) निकट अखिल नेपाल राष्ट्रिय स्वतन्त्र विद्यार्थी युनियन (अखिल) को संयुक्त गठबन्धनलाई पराजित गर्दै सम्पूर्ण प्यानलसहित विजय प्राप्त गरेका छन्। अध्यक्ष पदमा अशोक ढुंगानाको नेतृत्वमा रहेको टोलीले गठबन्धनका उम्मेदवारहरूलाई पछि पार्दै स्पष्ट बहुमत हासिल गरेको छ। यो जितले जलविरे क्षेत्रमा अखिल (क्रान्तिकारी) को संगठनात्मक शक्ति र विद्यार्थीहरूबीच लोकप्रियता उजागर गरेको स्थानीय विश्लेषकहरूले बताएका छन्।
मेलम्ची भ्याली क्याम्पसमा राजन गिरीको नेतृत्वमा सफलता
हेलम्बु क्षेत्रको मेलम्ची भ्याली क्याम्पसमा पनि अखिल (क्रान्तिकारी) का उम्मेदवार राजन गिरी स्ववियु सभापतिमा निर्वाचित भएका छन्। यहाँ पनि नेविसंघ र अखिलको संयुक्त गठबन्धनलाई पछि पार्दै गिरीले आफ्नो नेतृत्वमा विजयी परिणाम हासिल गरे। निर्वाचनमा सहभागी विद्यार्थीहरूले गिरीको सक्रियता र विद्यार्थीमुखी एजेण्डालाई जितको प्रमुख कारण मानेका छन्। यो परिणामले हेलम्बु क्षेत्रमा क्रान्तिकारी विचारधारा र संगठनको प्रभाव बढ्दै गएको संकेत गरेको छ।
जुगल बहुमुखी क्याम्पसमा सुस्मिता श्रेष्ठ सर्वसम्मत
यसअघि नै साँगाचोकस्थित जुगल बहुमुखी क्याम्पसमा अखिल (क्रान्तिकारी) की उम्मेदवार सुस्मिता श्रेष्ठ सर्वसम्मत रूपमा स्ववियु सभापतिमा निर्वाचित भइसकेकी छन् । यहाँ गठबन्धन वा अन्य संगठनबाट कुनै प्रतिस्पर्धा नभएपछि क्रान्तिकारीले सहमतीय आधारमा केही स्थान अरुलाई समेत दिएर श्रेष्ठको नेतृत्वमा सहमति कायम भएको थियो। उनको निर्विरोध निर्वाचनले साँगाचोक क्षेत्रमा अखिल (क्रान्तिकारी) को एकल प्रभाव र संगठनात्मक एकताको प्रमाण प्रस्तुत गरेको छ।
यो निर्वाचनमा माओवादी केन्द्र निकट अखिल (क्रान्तिकारी) ले एकल रूपमा उम्मेदवारी दिएको थियो भने सत्तारूढ गठबन्धनका प्रमुख घटकहरू नेपाली कांग्रेस र नेकपा (एमाले) निकट विद्यार्थी संगठनहरूले संयुक्त रूपमा प्रतिस्पर्धा गरेका थिए। गठबन्धनको रणनीति र साझा उम्मेदवारीका बाबजुद अखिल (क्रान्तिकारी) ले तीनवटै क्याम्पसमा विजय हासिल गर्नुले विद्यार्थी राजनीतिमा नयाँ गतिशीलता देखाएको छ।
निर्वाचन परिणामपछि अखिल (क्रान्तिकारी) का जिल्ला नेताहरूले यो जितलाई विद्यार्थीहरूको क्रान्तिकारी विचारप्रतिको समर्थन र संगठनको मेहनतको परिणाम भएको बताएकाछन्। यो परिणामले सिन्धुपाल्चोक जिल्लाको विद्यार्थी राजनीतिमा अखिल (क्रान्तिकारी) को प्रभाव विस्तार भएको संकेत गरेको छ भने गठबन्धनको संयुक्त प्रयासलाई चुनौती दिएको छ ।
