७ चैत, काठमाडौं । भाटभटेनी सुपरमार्केटको ट्रकबाट ठूलो मात्रामा अवैध भेप बरामद भएपछि सिन्धुपाल्चोकको तातोपानी नाका फेरि चर्चामा आएको छ। यही प्रकरण संसदसम्म पुगेको छ । संसदमा सत्तारुढ नेकपा एमालेका नेताहरूमाथि एकपछि अर्को प्रश्नका वर्षा भएका छन्।
गए राति अस्थायी प्रहरी चौकी बाह्रबिसे खोर्सानीबारीले गोप्य सूचनाका आधारमा २२ लाख रुपैयाँ बराबरका ७४० थान अवैध भेपसहित ट्रक नियन्त्रणमा लिएको हो। चीनसँग जोडिने व्यापारिक नाका तातोपानी हुँदै काठमाडौं आइरहेको ना ६ ख ५४९६ नम्बरको ट्रक भाटभटेनी सुपरमार्केटको सामान बोकेको बताइए पनि त्यसबाट अवैध भेप भेटिएपछि शंका झन् बढेको छ।
संसदमा एमालेमाथि आलोचना
प्रतिनिधिसभामा यो विषय प्रवेश गर्दा सत्ताधारी नेकपा एमाले आलोचनाको केन्द्रमा परेको हो । भाटभटेनी सुपरमार्केटका मालिक मिनबहादुर गुरुङले एमालेको पार्टी कार्यालय निर्माणका लागि आर्थिक सहयोग गरेको विषय जोड्दै विपक्षी सांसदहरूले प्रश्न उठाएका हुन्। माओवादी केन्द्रका सांसद विश्व कार्कीले छानबिनको माग गर्दै भने सत्ताको नेतृत्व गरिरहेका एमाले नेताहरू सुशासनको भाषण दिन्छन्, तर पार्टी कार्यालय बनाउने सहयोगीको स्रोत के हो, भाटभटेनीका मालिकले कसरी यति ठूलो आर्थिक योगदान गर्न सके, आजको घटनाले सबै स्पष्ट पारिदिएको छ ।
उनले अर्को शंकास्पद ट्रक ना ६ ख ६६४७ पनि सशस्त्र प्रहरी बलले लामोसाँघुबाट नियन्त्रणमा लिएको र राजस्व अनुसन्धान विभाग, हरिहर भवन पुर्याइएको उल्लेख गर्दै पत्रकारहरूको रोहबरमा ट्रक खोलेर सत्यतथ्य सार्वजनिक गर्नुपर्ने माग गरे। राष्ट्रिय स्वतन्त्र पार्टी (रास्वपा) का सांसद मनिष झाले पनि सरकारलाई दाताहरुलाई जोगाउने खेल बन्द गर्न चेतावनी दिए।
तातोपानी नाका फेरि तस्करीको अखडा
भूकम्प र कोभिड १९ महामारीपछि निकै मेहनतले पुनः सञ्चालन गरिएका तातोपानी नाका तस्करहरूको खेलमैदान बन्दै गएको कतिपय विश्लेषकहरूको दाबी छ। व्यापारिक सहजताको नाममा आपराधिक गतिविधि मौलाउँदै गएको भन्दै यो घटनाले थप गम्भीर प्रश्न उठाएको छ। सरकार र सुरक्षा निकायले यस घटनाप्रति कस्तो कदम चाल्ने हो, आम नागरिकको चासो त्यसैमा केन्द्रित छ।
