१५ चैत्र, काठमाडौं । समाजवादी मोर्चाले आज काठमाडौंको भृकुटीमण्डपमा राजावादी विरुद्द विरोध सभा आयोजना गर्दै छ। आयोजकहरूका अनुसार कार्यक्रममा एक लाखभन्दा बढी मानिस सहभागी गराउने लक्ष्य राखिएको छ। यो प्रदर्शन हालै बढ्दै गएको राजतन्त्र समर्थक (राजावादी) आन्दोलनविरुद्धको शक्ति प्रदर्शनको रूपमा लिइएको छ। सभा सफल बनाउन काठमाडौंका विभिन्न स्थानबाट जुलुस निकाल्ने योजना बनाइएको छ।
पूर्वबाट आउनेहरू कोटेश्वर हुँदै बबरमहल, दक्षिणबाट ललितपुर हुँदै कुपण्डोल, पश्चिमबाट कलंकी हुँदै त्रिपुरेश्वर र उत्तरपश्चिमबाट बालाजु हुँदै सोह्रखुट्टेमा भेला हुनेछन्। ती जुलुसहरूको नेतृत्व नेकपा (माओवादी केन्द्र) ले गर्नेछ भने मैतीदेवी, डिल्लीबजार चोक र शान्तिबाटिकाबाट निस्कने जुलुसहरूको नेतृत्व नेकपा (एकीकृत समाजवादी) ले गर्नेछ। त्यस्तै, सुन्धाराबाट नेपाल कम्युनिस्ट पार्टीले र न्युरोड गेटबाट नेपाल समाजवादी पार्टीले जुलुसको नेतृत्व गर्ने छन्।
मोर्चाले यो विरोध सभालाई सरकारविरुद्ध मात्र नभई हालै देखा परेको राजावादी आन्दोलनको विरोधमा पनि शक्ति प्रदर्शनको रूपमा लिएको छ। उनीहरूले सामाजिक न्याय, आर्थिक समृद्धि र समाजवादी व्यवस्था स्थापनाका एजेन्डालाई अघि बढाउन यो सभा आयोजना गरेको बताएका छन्। सभा भृकुटीमण्डपमा सम्पन्न हुनेछ, सभामा विपक्षी दलका नेता लगायत विभिन्न दलका शीर्ष नेताहरूले सम्बोधन गर्ने कार्यक्रम तय गरिएको छ।
राजतन्त्र समर्थकले पनि जुलुस निकाल्ने बताएका छन भने कुलमान घिसिलाइ सरकारले हटाएकाे विराेधमा पनि विराेध जुलुस निकाल्ने तय भएका छन् ।
