१५ चैत काठमाडौँ । समाजवादी मोर्चाले गणतन्त्र रक्षाका लागि जस्तोसुकै आन्दोलन गर्ने बताएको छ । मोर्चाले आज काठमाडौंमा गरेको शान्तिपूर्ण सभामा नेताहरुले यस्तो प्रतिवद्धता व्यक्त गरेका हुन् । यसैविच नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले चैत १५ लाई नेपालको इतिहासमा एक महत्वपूर्ण दिनको रूपमा चित्रण गरेका छन्। समाजवादी मोर्चाले काठमाडौँमा आयोजना गरेको जनसभालाई सम्बोधन गर्दै उनले राजावादीहरूले प्रतिगामी सभा राखेर देशमा अराजकता फैलाउने प्रयास गरिरहेको बताए । प्रचण्डले उनीहरूले घरमा आगो लगाउने र प्रहरीमाथि ढुंगा हान्ने जस्ता कार्य गरेको बताए । उनले यस्ता गतिविधिले गणतन्त्रवादी र राजावादीको चरित्र स्पष्ट भएको बताए।
प्रचण्डको सम्बोधनमा गणतन्त्रको रक्षाप्रति दृढता व्यक्त गर्दै इतिहासलाई पछाडि फर्काउने कुनै पनि प्रयास अस्वीकार्य हुने चेतावनी थियो। उनले मधेशी, आदिवासी जनजाति र मजदुरहरूको युद्धबाट प्राप्त उपलब्धिहरूको बलमा गणतन्त्र अब कुनै पनि हालतमा पछि नफर्किने जिकिर गरे। पूर्वराजा ज्ञानेन्द्र शाहलाई लक्षित गर्दै उनले थप गल्ती गरेमा कुनै पनि सम्झौता बाँकी नरहने कडा चेतावनी दिए। प्रचण्डले विगतमा गणतन्त्रवादीहरूले गरेका कमजोरीहरूका कारण प्रतिगामी शक्तिहरूले टाउको उठाएको स्वीकार गर्दै आत्मसमीक्षा र सुधारको प्रतिबद्धता पनि व्यक्त गरे।
यसै क्रममा, प्रचण्डले नयाँ क्रान्तिको आवश्यकतामाथि जोड दिए। उनले पुँजीपति र बिचौलियाहरूले अतिवादीहरूलाई उक्साएर सामन्तवादलाई बल पुर्याइरहेको आरोप लगाए। उनका अनुसार, यस्तो अवस्थामा सबै सामन्ती तत्वलाई समाप्त गर्न र बिचौलियाहरूको सेटिङ भत्काउन अर्को क्रान्ति अपरिहार्य छ। उनले आफूलाई सरकारबाट बाहिर धकेलिएको दाबी गर्दै यो षड्यन्त्रमा सबै शक्तिहरू एकजुट भएको बताए। प्रचण्डले यो आन्दोलनलाई व्यक्तिगत लडाइँभन्दा पनि प्रवृत्ति र कुशासनविरुद्धको संघर्षको रूपमा परिभाषित गरे।
प्रधानमन्त्री केपी शर्मा ओलीप्रति कडा टिप्पणी गर्दै प्रचण्डले ओलीलाई ‘नर्कतिर गएको’ व्यक्ति भन्दै व्यंग्य गरे। उनले कुलमान घिसिङको विषयलाई लिएर ओलीको जवाफदेहितामाथि प्रश्न उठाए। संसद्मा ओलीले जवाफ नदिएसम्म आन्दोलन चर्काउने चेतावनी दिँदै उनले यो लडाइँ व्यक्तिको नभई सुशासन र कुशासनबीचको भएको दोहोर्याए। प्रचण्डले ओलीमा अहंकार रहेको र उनी जवाफ दिन नआउने ठोकुवा गरे। साथै, ओलीको विगतका अभिव्यक्तिलाई जोड्दै उनले राजावादीहरूसँग मिलेको आशंका पनि व्यक्त गरे।
संविधान संशोधनको मुद्दालाई पनि प्रचण्डले जोडदार रूपमा उठाए। उनले काँग्रेस र एमालेले संशोधनको कुरा गरेर जनतालाई भ्रममा पारेको आरोप लगाए। संविधान अधिकार दिनका लागि बनेको भन्दै यसमा रहेका कमजोरी सच्याउन सबै दलहरूबीच समीक्षा आवश्यक रहेको उनको भनाइ थियो। उनले संविधान संशोधन नभए निरंकुशताबाट मुक्त भएको जनता फेरि क्रान्तिमा उत्रने चेतावनी दिए। प्रचण्डले काँग्रेस र एमालेबाट सरेको ‘रोग’ ठीक गर्न जनतामाझ गएको बताउँदै स्थानीय तहबाटै समाजवादको आधार तयार पार्ने र आत्मनिर्भर अर्थतन्त्र निर्माण गर्ने दृष्टिकोण प्रस्तुत गरे।
