सिन्धुको समृद्धिका लागि नेकपाका उम्मेदवारको साझा अठोट: ‘सुशासन र पूर्वाधार मुख्य प्राथमिकता’-पूर्णपाठ

सिन्धुपाल्चोक जिल्लाका दुवै निर्वाचन क्षेत्रमा नेपाली कम्युनिष्ट पार्टी (नेकपा) का तर्फबाट प्रतिनिधि सभा सदस्यका उम्मेदवारहरूले आफ्नो चुनावी प्रतिबद्धता-पत्र सार्वजनिक गरेका छन्।

३ फागुन, चौतारा। सिन्धुपाल्चोक जिल्लाका दुवै निर्वाचन क्षेत्रमा नेपाली कम्युनिष्ट पार्टी (नेकपा) का तर्फबाट प्रतिनिधि सभा सदस्यका उम्मेदवारहरूले आफ्नो चुनावी प्रतिबद्धता-पत्र सार्वजनिक गरेका छन्।

फागुन २१ गते हुने उपनिर्वाचनका लागि क्षेत्र नं. १ का उम्मेदवार माधव सापकोटा ‘सुबोध’ र क्षेत्र नं. २ का उम्मेदवार युवराज दुलाल ‘शरद’ले चौतारामा पत्रकार सम्मेलन गर्दै जिल्लाको समग्र विकासको खाका प्रस्तुत गरेका हुन् ।

क्षेत्र नं. १: माधव सापकोटाका ‘११ संकल्प’

निवर्तमान सांसद समेत रहेका सापकोटाले आफ्नो ३३ महिनाको संसदीय कार्यकालको अनुभव र अधुरा कामलाई पूर्णता दिने अठोट व्यक्त गरेका छन्ग । उनको प्रतिबद्धतापत्रमा विशेष गरी ‘जीवन्त संसद’ र पर्यटनलाई जोड दिइएको छ ।

सापकोटाका मुख्य योजनाहरू:

• पर्यटन र पूर्वाधार: ‘काठमाडौंबाट एकै दिनमा जुगल’ पुग्न सकिने गरी सडक पूर्वाधारको विकास गर्ने र जुगल हिमाललाई प्रमुख पर्यटकीय हब बनाउने लक्ष्य राखिएको छ ।
• रोजगारी: आगामी ५ वर्षमा पर्यटन र सूचना प्रविधि क्षेत्रमार्फत ५ हजार युवालाई प्रत्यक्ष रोजगारी दिने भनिएको छ ।
• नाका व्यवस्थापन: तातोपानी नाकालाई थप व्यवस्थित र प्रभावकारी बनाउन निरन्तर प्रयत्न गर्ने प्रतिबद्धता व्यक्त गरिएको छ ।
• शिक्षा र स्वास्थ्य: सामुदायिक विद्यालयलाई नमुना आवासीय विद्यालय बनाउने, प्लस टु पछि रोजगारीको सुनिश्चितता गर्ने र हरेक वडामा विशेषज्ञ स्वास्थ्य सेवा पुऱ्याउने योजना छ ।
• सुशासन: सार्वजनिक पदमा रहेकाहरूको सम्पत्ति छानबिन गर्ने र भ्रष्टाचारीको सम्पत्ति राष्ट्रियकरण गर्ने विषयलाई प्राथमिकतामा राखिएको छ ।
• प्रविधि: “डिजिटल सिन्धुपाल्चोक” निर्माणका लागि गाउँ-गाउँमा उच्च गतिको इन्टरनेट र डिजिटल साक्षरता केन्द्र स्थापना गर्ने ।

क्षेत्र नं. २: युवराज दुलालको ‘विकासको बाकस’

क्षेत्र नं. २ का उम्मेदवार युवराज दुलालले ‘बाकस भरी भोट, बाकस भरी विकास’ भन्ने नाराका साथ “विकासको बाकस – २” परियोजना अघि सारेका छन् ।

दुलालका मुख्य प्रतिबद्धताहरू:

• सडक सञ्जाल: आगामी ५ वर्षभित्र निर्वाचन क्षेत्रका सबै वडाका मुख्य सडकहरूलाई बाह्रै महिना चल्ने (All Weather) स्तरीय सडक बनाउने। मध्यपहाडी लोकमार्गको सिन्धुपाल्चोक खण्ड ३ वर्षभित्र सम्पन्न गर्ने।
• सहरी विकास: मेलम्चीलाई ‘व्यवस्थित सहरी पूर्वाधार’ सहित काठमाडौंबाट १ घण्टामा पुग्न सकिने गरी विकास गर्ने र चौतारालाई सम्पदा मैत्री सहर बनाउने।
• कृषि र किसान: बाँदर, बँदेल जस्ता जंगली जनावरबाट बाली संरक्षण गर्न र कृषि उपजको न्यूनतम समर्थन मूल्य तोक्ने कानूनी व्यवस्था गर्ने। रासायनिक मलको अभाव हुन नदिने।
• प्रणाली सुधार: प्रत्यक्ष निर्वाचित कार्यकारी प्रमुख र विज्ञहरूको मन्त्रिपरिषद्को पक्षमा वकालत गर्ने तथा संघीय र प्रदेश मन्त्रिपरिषद्को संख्या घटाउन पहल गर्ने।
• तटीय क्षेत्र संरक्षण: मेलम्ची र इन्द्रावती नदी तटीय क्षेत्रको संरक्षणका लागि ‘एकीकृत विकास परियोजना’ लागू गर्ने।
• गुठी समस्या: पुस्ताौंदेखि गुठी जग्गामा बस्दै आएका किसानको समस्या कानूनी रूपमा समाधान गर्ने।

सामूहिक चासो र सुरक्षा तयारी

दुवै उम्मेदवारले आफ्नो प्रतिबद्धता-पत्रमा जलवायु न्याय, विपद् व्यवस्थापन र वैदेशिक रोजगारीमा रहेका नेपालीलाई मतदानको अधिकार दिलाउने विषयलाई साझा एजेन्डाका रूपमा उठाएका छन् ।

प्रतिवद्धता पत्र सार्वजनिक गर्नुअघि उम्मेदवारहरू सहितको टोलीले मुख्य निर्वाचन अधिकृत, प्रमुख जिल्ला अधिकारी र सुरक्षा निकायका प्रमुखहरूसँग भेटघाट गरेको थियो। सो क्रममा निर्वाचनलाई स्वच्छ, निष्पक्ष र भयरहित वातावरणमा सम्पन्न गराउने विषयमा छलफल भएको थियो। नेकपाले ‘तारा’ चिन्हमा मतदान गर्न आग्रह गर्दै यो निर्वाचनलाई देशको भविष्यको मार्ग तय गर्ने अवसरका रूपमा लिएको जनाएको छ ।

पूर्णपाठ

प्रतिक्रिया