६ चैत, सिन्धुपाल्चोक । गत फागुन २१ गते सम्पन्न प्रतिनिधिसभा सदस्य निर्वाचनमा सिन्धुपाल्चोक निर्वाचन क्षेत्र नं. १ बाट यसअघि जनप्रतिनिधि बनेका माधव सापकोटा ‘सुबोध’ यसपटक संसद यात्राबाट रोकिएका छन् । राष्ट्रिय स्वतन्त्र पार्टीका भरतप्रसाद पराजुली विजयी हुँदा नेपाली कम्युनिष्ट पार्टीका सापकोटाले दोस्रो स्थानमा चित्त बुझाउनु परेको हो ।
चुनावमा हार बेहोरे पनि सापकोटाले जनताको घरदैलोमा जाने आफ्नो पुरानो कार्यशैलीबाट भने रोकिएनन्। चुनावी परिणाम सार्वजनिक भएलगत्तै उनले निर्वाचन क्षेत्रका आठवटै स्थानीय तहमा पुगेर मतदाता, नेता तथा कार्यकर्तासँग भेटघाट र धन्यवाद ज्ञापन कार्यक्रम सम्पन्न गरेका छन् । निर्वाचनको दौरान भेटघाट तथा सुझाव संकलन अभियान चलाएका उनले चुनावपछिको यस अभियानलाई ‘आभार तथा धन्यवाद कार्यक्रम’ नाम दिएका थिए ।
सापकोटाले चैत २ गते बाह्रबिसे नगरपालिका, त्रिपुरासुन्दरी गाउँपालिका र भोटेकोशी गाउँपालिकाका मतदाता तथा कार्यकर्तालाई भेटेर धन्यवाद दिएका थिए । यस्तै, चैत ३ गते बलेफी र चौतारा साँगाचोकगढी नगरपालिकामा भेटघाट गरेका उनले चैत ४ गते जुगल गाउँपालिका र चैत ५ गते लिसंखुपाखार गाउँपालिका पुगेर कार्यक्रम समापन गरे ।
भूगोलका सबै भेटघाट सम्पन्न गरेपछि सापकोटाले भने, “आम जनताले उम्मेदवार पो चिन्तामा छन् कि भनेर चासो राखेको पाएँ । चुनाव हारेपछि यसअघि कोही पनि यसरी मतदाता भेट्न र धन्यवाद दिन नगएका कारण हामीलाई देख्दा धेरैले आश्चर्यसमेत प्रकट गर्नुभयो ।”
भेटका क्रममा धेरै मतदाताले हार व्यहोरेर पनि विजेताभन्दा अघि गाउँ आएकोमा खुसी व्यक्त गरेको सापकोटाले बताए । “जितेकाहरू अझै आइपुगेका छैनन्, तपाईं हारेर पनि धन्यवाद भन्न आउनुभयो भन्दै जनताले देखाएको सामिप्यताले नयाँ ऊर्जा पैदा गरेको छ,” उनले सुनाए ।
यस क्षेत्रमा २०६४, २०७०, २०७४ र २०७९ सम्म लगातार जित्दै आएको माओवादी धारले यसपटक पहिलो पटक पराजय भोग्नुपरेको हो । तर, हारपछि पनि घरदैलोमा पुग्दा जनताको माया र सद्भाव अझ बढी प्राप्त भएको सापकोटाको अनुभव छ । उनले थपे, “राजनीतिमा हारजित स्वाभाविक हो, तर जनताको यति धेरै माया र निरन्तरको हौसला पाउँदा खुसी लागेको छ ।”
भेटघाटका क्रममा सापकोटाले आफू पदमा रहे पनि नरहे पनि सधैँ जनताकै बीचमा रहने र जिल्लाको विकास एवं समृद्धिका लागि निरन्तर लागिरहने प्रतिबद्धता व्यक्त गरेका थिए । मतदाताले भने यस पटक जनप्रतिनिधि बनाउन नसकेपनि सुख-दुःखमा साथ दिने नेता पाएकोमा खुसी व्यक्त गरेका थिए ।
नेपाली कम्युनिष्ट पार्टी निर्वाचन क्षेत्र नं. १ ले जिल्लाका सबै पालिकामा धन्यवाद ज्ञापन कार्यक्रम सकेको जनाएको छ । चैत ७ गते शनिबार काठमाडौँमा रहेका मतदातासँग भेटघाट गर्ने कार्यक्रम तय भएको छ । शनिबार बिहान ११ बजे पेप्सीकोलास्थित ‘न्यू त्रिशक्ति पार्टी प्यालेस’ मा काठमाडौँवासी मतदातालाई धन्यवाद दिने कार्यक्रम आयोजना गरिएको सापकोटाले जानकारी दिए । अभियानले युवा नेता सापकोटाप्रति आम जनताको आत्मीयता र विश्वास थप बढाएको देखिएको छ ।
