२७ जेठ ,काठमाडौँ । दक्षिण-पश्चिम चीनको युन्नान प्रान्तको राजधानी कुनमिङमा १० औँ चीन-दक्षिण एसिया एक्स्पो भोलि बिहीबार देखि औपचारिक रूपमा सुरु हुँदैछ। जुन १६ सम्म चल्ने यस भव्य व्यापारिक मेलाले चीन र दक्षिण एसियाली मुलुकहरूबीच पारस्परिक हित र सहयोगका माध्यमबाट नयाँ व्यावसायिक अवसरहरू सिर्जना गर्ने विश्वास चिनियाँ अधिकारीहरूले व्यक्त गरेका छन्।
यस वर्षको एक्स्पोमा दक्षिण एसिया, दक्षिण-पूर्वी एसिया र क्षेत्रीय व्यापक आर्थिक साझेदारीका सदस्य राष्ट्रहरू सहित ६० भन्दा बढी देश तथा क्षेत्रहरू र अन्तर्राष्ट्रिय संस्थाहरूले सहभागिता सुनिश्चित गरिसकेका छन्। यस पटकको मेलामा बंगलादेश ‘थिम कन्ट्री’को रूपमा रहेको छ भने लाओस विशेष आमन्त्रित साझेदार मुलुकको रूपमा सहभागी छ। साथै इटाली, उरुग्वे र अस्ट्रेलिया लगायतका सात देशका दूतावास तथा वाणिज्य दूतावासहरूले पहिलो पटक राष्ट्रिय प्रदर्शनी समूहका रूपमा यस एक्स्पोमा डेब्यु गर्दैछन्।
चीनको वाणिज्य मन्त्रालयका अनुसार चीन र दक्षिण एसियाली देशहरूबीचको द्विपक्षीय व्यापारमा ठूलो उछाल आएको छ। सन् २०२५ मा पहिलो पटक यो व्यापार १०.७ प्रतिशतको वार्षिक वृद्धिसहित २०० अर्ब अमेरिकी डलर पार भएको थियो भने सन् २०२६ को पहिलो चार महिनामा मात्रै चीन र दक्षिण एसियाबीचको व्यापारमा १५.८ प्रतिशतको वृद्धि देखिएको छ।
चीन र दक्षिण एसियाली मुलुकहरूले विश्वको कुल गार्हस्थ्य उत्पादनको २० प्रतिशत हिस्सा ओगट्ने र करिब ३ अर्ब जनसङ्ख्याको विशाल बजारको प्रतिनिधित्व गर्ने भएकाले यो एक्स्पोले सहकार्यको ठूलो सम्भावनालाई उजागर गर्ने अधिकारीहरूको भनाइ छ। विस्तृत विवरणहरू समेटिएको प्रतिवेदनका अनुसार यस मेलाले विशेष गरी नेपाल र चीनबीचको सदियौँ पुरानो ऐतिहासिक सम्बन्धलाई आधुनिक मञ्च प्रदान गरेको । नेपालले यस वर्ष पनि सहभागिता जनाएको छ ।
कुनमिङको डियान्ची अन्तर्राष्ट्रिय महासभामुख तथा प्रदर्शनी केन्द्रमा आयोजना हुन लागेको यस मेला नेपालका लागि निकै महत्त्वपूर्ण साबित भएको छ। नेपाल र चीनबीचको औपचारिक कूटनीतिक संबंध स्थापनाको ऐतिहासिक ७० औँ वर्षगाँठको अवसरमा यो एक्स्पो आयोजना हुनुले थप भावनात्मक महत्व बोकेको छ।चिनियाँ उपभोक्ताहरूको रुचि र आधुनिक माग अनुसार नेपाली व्यवासइ तथा कलाकारहरूले आफ्ना उत्पादनको रङ र डिजाइनमा परिमार्जन गर्न थालेका छन्। कुनमिङ एक्स्पोमा प्राप्त हुने ठूला व्यावसायिक अर्डरहरूले काठमाडौँ वा पोखराका व्यवसायीलाई मात्र नभई नेपालका ग्रामीण क्षेत्रका व्यवासयी र काठकालिगढहरूको दिगो आम्दानी सुनिश्चित गर्न मद्दत पुर्याएको छ।
